Slíab Echtge II preface Tri hollamain Chondacht .i. mac Liacc ⁊ mac Coisi ⁊ Fland mac Lonain .i. mac De ⁊ mac duine ⁊ mac deamain. Fland mac Lonain, mac deamain side ara geri ⁊ ara duilgi, uair ni deachaid a tig riam cen easba aire do denum cen esba aíre do dénum and. Mac Liac imorro mac duine ar febas a thigidis ⁊ ara febus arai in duine fen. Mac Cosi imorro mac De ar met a derci ⁊ is bas ailithri ruc. llrechtach imorro ainm timpanaich meic Liac ⁊ timpanach meic Lonain roime he ⁊ dobai ac mac Liac iar n-ec meic Lonain. Dochuaid mac Liac do indsaigid Briain dia acallaim ⁊ Illrechtach mailli fris. IS amlaid notheighed co menic o loch Riach tar Echtgi fodeas co Luimneach ocus da puitric dec lais con a mbiad dingbala leo. Uair is da radarc dec atat a n-Echtgi ⁊ puitric noibead in cach radarc dibsin. Feacht and tra dochuadar fodeas ⁊ rosuidsedar i n-aroile cnuc inti .i. ceann Crochain ⁊ adbert mac Liag: Is imda cnoc ⁊ loch ⁊ dingna ⁊ robad fis mor a fis uili. Albert Ilrachtach: damad he mac Lonain nobeith sunn nobiad aici a fis dinds.eanchais cach inaid sund. Adbert mac Liag: Gabair sut ⁊ crochair he. Rochunnig Ilrechtach dal co maidin ⁊ tucad do can a chrochad, ⁊ rothraisc an aidchi sin co toracht anum Floind meic Lonain dia chobair. o drechtadar madan moch iarnabarach, adchonncadar chucu mac Lonan ⁊ adbert riu: Leigid uaib in cimid ⁊ indisfead duib seanchas cach dingna sunna isin nEchtgi. Rosaerad amlaid sen in timpanach cen a chrochad ac mac Liag ⁊ adbert mac Lonan and sin in duan-sa and.
