Loch Febail Coluim Cille, ed. Kuno Meyer (ZCP). Work in progress. Bāithīn mac Cūanach cecinit. Loch Febail Coluim Cille mar do cheaduigh Rī nime, ic dīladh aighed [note 2] co fīr mac Fei[d]limid gan anfhir. In ūair bái a Carruig Eolairg Colum Cille gan mebail, dogeibt[h]i lasg gan doinnme do coinnme ag Loch Febuil. As e Dīa rodelbustair, rāidhim-si rib co tuigsi, dobert[h]ai blas lemnachta is brīg fīna 'na uisge. Cochall tana iss lapar lin, inar nār min fa cnes nua, a c[h]omrād ba soglan sēim ōs līnib lebrāin 'ga lūadh. Colaim ō Nēill, nāemht[h]a in tsāi, robo maorda a reim rea ré, fidh flesgach fa ūaig a nHī docūaid a clī esbuic ē. Fada lea Rīg co rūacht nem, tīr gan fhūacht an tīr do togh beith 'ga cāi robad clē dam, ō do bī toil De 'na dul. Gēr maith leis beith mur dobī, nochar deis e le dreich nDē, gē dosanntaig bhetha[id] mbī, nīr tsechain Rī an alltair ē. As ferrdi dō ēg don fir, bēd as mō inā gach mogh, cinnus rosīa nech ar nem, ar ceal mana dech rē ndol ? Nech fa binne inā gach bēl, drech fa gili inā gach grūadh, deslām glēgeal os cinn grād, slān teigheadh gach eslān ūadh. Ba maith da coinnim rea rē, gid beg do loingedh 'na clī nocha tāinic ar mag raon laech nā nāem rob ferr am [1] nī. Fa robeg dō midh a dil, robo min é, robo mōr, corp Dé rocaithed dar ndīn, fīn nocharb ē a mīan a ōl. Gūaire mac Colmāin aniar, Cūchulaind, Colaim na clīar, rob īad-sin an trīar gan deibech as ferr enech táinic rīam. Nī da roichedh 'na láim clī Colum cille, fāth gan gāi, nocha soiched 'na láim deis gan a imirt gan ēisleis. Ba maith a gellad gerbh oll, nī fellad ar a comall, dobīd da gach leith gach drong ag īarraid neich ar Colam. Nochar taisced peinginn rīam do chisti ag Colum na clīar, acht a bronnud da gach neoch ar fhēile ocus ar einech. Doteighed Colum gu fīr d'agallaim a Rīgh gu moch, cach óin peturlaic do lēgh, coinnmi do rīarad gan locht. Is mesi fēin Baithīn bān atā ar ndāl gu Rīg na roth, is [2] fada dam beith a coluinn ocus gan Coluim 'ga loch. L. F.
